E verent lor François, lor targes enbraçees
E les lances sor mains un petit abasees.
Asez se sunt les host d’anbe pars tastonees,
Mais n’i porent veoir vantage dos derees.
Maintes pieres agües lor hont Paiens rüees,
E François maintes lances lor ont treit e lancees.
Quant asez sont les ost d’ambes part agrevees,
Lors se partent ensanble, s’ont les cauces leisees ;
Maintes targes rumpues en unt ou els portees.
A desarmer lor cors mestrent entante e cure.
François s’an tornerent la petite emblaüre ;
Quant furent desarmez, si fu la noit oscure.
Dedanz la rice tende, dun d’or fu l’orleüre,
Conterent a Carluns ou la fiere figure
Comant asalirent Paiens trosqu’en la mure
E de la maistre porte ont rumpue la penture.
Li rois respont irez et saint Donis en jure
Qe de Rollant prendra une venjance dure,
Car por son departir et sol por sa fature
A hoi de Pampalonie perdue la droiture.
Or lesomes de Carles, si feruns menteüre
Dou jentil cont Rollant, qe ne garde a mesure :
Comant il en port bleisme, segir veult sa nature.
Li duzes compagnons li furent et Ogier.