Grande fut l’oferande qu’il y fist presenter ;
De bons deniers fut conblé l[y] auter
Et de bon or et d’argent blanc et cler.
LA messe chanta l’arcevesque Ysoré
En Quidalet l’admirable cité.
Après la messe a l[y] bon roys parlé,
L’Arcevesque en a aresonné :
« Sire arcevesque, dist Charlez le sené,
« Merci à Dieu le roy de majesté,
« Prinse abvon ceste bonne cité,
« Non pas par force, mais par la vertu Dé ;
« Mainte grant payne y abvon enduré
« Pour essaurer ceste crestïenté.
« Bien a sept ans acompliz et passé
« Que nous venismez de France en cest regné
« Qui[erre] ceste ville qui moult nous a grevé ;
« Moult vous y estez d’armes moult bien porté,
« Bien l’avez fait comme prodomme sené,
« Ge vous la donne, tretout en equité,
« Par tel convenant comme vous est devisé, (fo 42 vo)
« Quar par vous, [sere, en] seré moult aidé. »
L’Arcevesque l’en a bien mercïé :
« Sere, dist il, .V.c merciz de Dé !
« Ge vous otray de bonne volanté