Tanto que el vene e Guglemo e Beltran.
Una dama avoit d’un parenté gran,
Fila d’un enperer qe oit gran posan,
De Costantinopli, ensi l’apela la jan.
Blançiflor avoit nome cele dan,
Loial e bone, e de grand esian.
Or entenderés la fin d’es roman ;
Qe Deo vos beneie e meser san Joan !
Gran cort manten K. l’inperaor
Entro Paris, son pales maior.(*)
Ilec estoit mant filz de valvasor
E manti dux, prinçes e contor,
E le dux N. so bon conseleor.
Unqes el segle non estoit nul milor,
Ne qe de foi tant amase son segnor,
Ne qe tanto durase e pena e dolor.
Sor tot les autres estoit coreor,
Unde da Deo el n’ave gran restor,
Da Deo del celo, li maine criator.
Quatro filz oit de sa çentil uxor
Qe fo di doçe per e fo fin çostreor.
En Roncival fo morti à dolor,
