« Qe mais pensese mal de l’inperer.
« E se mais vers moi e v’oldo si parler
« E derier moi tel rason conter,
« A mon sire le diro senza entarder.
« Malvasio hom, con l’olsas tu penser
« De ton segnor tel parole parler ?
« Se l’olsoit, no t’en poroit guarenter
« Toto l’avoir qe se poust trover
« Q’elo no te faïst à dos fors apiçer.(*)
« Tosto da moi vos deça desevrer,
« E ben vos guardés de micha mais parler,
« De tes paroles à moi derasner. »
Machario l’olde, s’en pris à vergogner ;
Da le se parte cum toto mal penser.
Blanciflor la raine fu arere torné,
Sor son palès s’en fo reparié.
De dol et d’ire oit son cor abusmé,
E Macario se ne fo travalé ;
S’el no la oit à soa volunté,
De son vita non cura anpelo pelé,(*)
E die e noit por le stoit en pensé.
