« Que ja dou roi osasse mal penser.
« Se mais vers moi vos en oi si parler
« Ou tel raison derriere moi conter,
« A mon segnor le dirai sans targier.
« Malvais ribaus, com l’osas tu penser
« De ton segnor tel parole parler ?
« Se il l’oïst, ne t’en porroit garder
« Trestos l’avoirs que on péust trover
« Ne te fesist as forches encroer.
« Or tost de moi vos estuet desevrer,
« Et bien gardés uimais ne m’aparlés,
« Ne tés paroles vers moi ne deraisnés. »
Macaires l’ot, prist s’en à vergoignier ;
D’ele se part à tout moult mal penser.
Or est ariere la roïne torné, (*)
En son palais si s’en est repairié. (*)
De duel et d’ire ot son cuer abosmé.
Et s’est Macaires traveillié et peiné ; (*)
Se ne fait d’ele tote sa volenté,
Il ne se prise vaillant .i. ail pelé,
Et nuit et jor por ele ert en pensé.
