Qe la gardase d’aco si fer torment
Como estoit de le fogo ardent.
Meesmo l’inperer d’ele era dolent,
Q’elo l’amava de fe e dolçement ;
Mais tanto temoit li blasmo de la jent
Qe de l’escanper el non po far nient
Q’ela non mora à dol e à torment.
E cil Macario, cun tuti ses parent,
Encontra le senpre stava vi atent
De condur le à le fogo ardent.
Conseil dona à li rois spese fois e sovent
Qe d’ele faça tosto le çuçement :
« E se nol faites, sacé ad esient
« Qe blasmé en serés entre tota la jent ;
« Petit e grandi vos tira por nient. »
Quando li rois intende li baron,
Desovra tot li parent Gainelon,
Qe contra la raine furent si enpron
De le oncir sença reençon,
Le rois la plure et le duc Naimon.
Li enperere, quando vide la tençon
Qe altri plas e altri non sa bon,
De çuçer la raine fasoit mencion.
