Li fel Macaires, li cuivers renoiés.
Cil le destruie qui tot a à jugier !(*)
Et l’emperere ot plevi et juré
Ardoir fera la roïne et brusler.
De soi desfendre n’a ele mot soné ;
Tel vergoigne ot n’en a le chief levé,
Maléurée, lasse se vait clamer. (*)
Quant la roïne ot véu cele gent
Et voit le roi qui tant a mautalent,
Macaire voit emprès lui ensement
Qui l’achoisonne et dure et asprement (*)
D’estre bruïe et non d’autre torment,
Dont prise fu d’icele male gent.
A une part l’en menent coiement (*)
Et le nain d’autre à celée, entretant
Que la novele s’espandoit par la gent,
Parmi Paris, et derrier et devant.
Chascuns la plore, d’ele furent dolent,
Que tant estoit saiges et avenans,
Dou suen donoit tant à la poure gent ;
As chevaliers qui n’orent tenement,
A lor moilliers donoit le vestement.
Chascuns prioit Damedieu doucement
