De contrarier Macario li paroit gran folie.
Voluntera s’en alast, quant li rois li contralie
Et li rois dolçement le preie
Qe cun Macario, non contrarij ne mie,
Stia à veoir cun l’ovra sera finie.
E quel Macario, c’oit le cor enbrasie
Contre la raina, qe peçé nen oit mie,
Por ço que far non volse la soa comandie,
Quant li rois l’intent, sa parola oit agraie,
De çuçer la raina s’encor il se plie.
Davant se la fa mener vestua de samie ;
Le rois la guarda, le cor sego omilie,
Si la pluro, veçando la baronie.
Davanti li rois fo la raina mené,
E fo vestua d’une porpora roé.
Sa faça qe sol eser bel e coloré
Or est venua palida e descoloré.
Li rois l’eguarda, por le n’oit pluré.
E quela li guarde, si le oit dito e parlé :
« O çentil rois, mal conseil a pié
« Quan tu me çuçi à torto e à peçé !
« Colu qe à toi a le conseil doné
« No t’ama ren d’un diner moené,
