« Ne vos en puist puis reprendre et blasmer. »
Li rois l’entent, moult le prist à gréer ;
Ja l’otriast, quant li fel pautoniers
Isnelement le vait contralier. (*)
Et si li dist : « Emperere, frans ber, (*)
« Com poés vos tel conseil escouter
« Que cil te done qui ne t’aime un denier,
« Quant il vos loe de mettre en respitier (*)
« Ceste joutice où tant a reprovier
« Que par nul home ne se puet ja celer ?
« Et s’aucuns est qui ce voille noier, (*)
« Prenge ses armes et si monte el destrier ! »
Quant cil l’entendent qui sont au conseiller,
Quant Macaire oient si hautement parler,
Mal de celui qu’osast vers lui tenser. (*)
Nes uns n’en fu qui li responde arier.
Dont voit li rois n’en puet par el aler
Del jugement nel face sans targier.
Quant voit dus Naimes le roi asoploier, (*)
D’illec se part si laisse le parler ;
Ja del palais s’en voldra devaler,
Quant l’emperere ne le consent aler.
Quant li dus Naimes a la parole oïe,
Et dou jugier li pert grans estoutie,
