« Avec la dame fuis onc en ton vivant ?
— Oïl voir, sire, une fois et bien cent
« Fui avec ele el lit et autrement. »
Quant l’oit Macaires, voiant tote la gent,
El feu le rue, si dist : « Va, soduians ;
« Le roi honnis, ne t’en iras vantant ! »
Ensi le fait ardoir el feu ardent. (*)
Por ce le fist que ja en son vivant
De cele chose mais ne desist noient.
Or li nains art, li traïtre puslens ; (*)
Chascuns le voit, li petit et li grant,
La maïsté de Dieu en vont loant.
Et la roïne remaint illec devant,
Et plore et plaint et ses poins vait tordant, (*)
Et prie Dieu cui tos li mons apant (*)
Qu’il ait de s’ame merci par son commant.
La roïne est devant l’emperéor ;
Illec se tient et à dol et à plor,
Et prie Dieu, l’umainne réentor,
Que voille faire de s’ame le meillor,
Que aler puist à la gloire maior.
Le roi apele, si li dist par amor :
« Gentis rois sire, por Dieu le criator,
