« Fus tu cun la dame uncha à ton vivant ?
— Oil voir, sire, una fois e sesant
« Son stat cun le in leto et altremant. »
Quando Machario l’olde, veçando tote jant,
En le fois le rue si dis : « Va, seduant,
« Honi a tu li rois, ne t’ençira vantant ! »
Et ensi le fait arder in fois ardant.
Por ço le fi Machario que mais en son vivant
De quella colse ma non deise niant.
Or fo li nan arso, qe fe li tradimant ;
Çascun qe le voit, e petiti e grant,
En laudent Deo e la majesté sant.
E la raina fo ilec davant,
E plura e plançe e ses man destant,
E prega Deo e la majesté sant
Merçe aça de sa arme à li son comant.
La raina fo davanti l’inperaor,
Et ilec stoit à dol e à plor.
E prega Deo, li maine redentor,
Qe de soa arma faça li meior,
Qe aler posa à la gloria maior,
Li rois apele, si le dis por amor :
« Çentil rois sire, por Deo le creator,
