« D’ele ferai trestot le mien talent. » (*)
Dist Auberis : « Non fras, mien ensient, (*)
« Ains tasterés del trenchant de mon branc ! »
Dist Auberis : « Ja nel te quier noier,
« Tu m’es por mal avenus çà derrier,
« Por la roïne que je ai à guier. (*)
« Quant le sara l’emperere au vis fier,
« Et li Danois, et Naimes de Baivier,
« Tos tes avoirs ne te porra garder
« Que ne te face as forches encroer.
« Arrier te trai, ne querir encombrier ;
« Ce que tu penses ne te vaut un denier. »
Et dist Macaires : « Tu ne l’en pues mener,
« Et se de rien tu veus son cors tenser,
« Ja t’estovra de male mort finer. »
Quant voit Macaires que ne la vuet baillier,
Encontre lui vait poignant son destrier.
Et Auberis si fu preus et legiers ;
Trait a s’espée, si la vait chalengier. (*)
S’Auberis fust fervestus et armés, (*)
Bien la tensast encontre un chevalier.
L’un envers l’autre lait le cheval aler.
Auberis tint le branc forbi d’acier,
