Devers Macaire s’en vait come senglers.
Et point Macaires et broche le destrier,
Et brandist l’anste où ot bon fer d’acier. (*)
Cil est dou tot fervestus et armés,
Et Auberis n’ot fors branc d’acier, (*)
Si que mal pot à Macaire plaidier.
Grans fu la joste d’ambedeus chevaliers.
Hom desarmés ne vaut mie un denier (*)
Contre qui est armés et haubergiés. (*)
Macaires fiert Aubri un cop plenier ;
Et cil n’ot arme dont se péust tenser ;
Parmi le cors li mist l’espié d’acier,
Mort l’abati en l’erbe vert del pré.
Quant la roïne voit le plait si aler,
Tant come voit la bataille durer,
Si durement se prist à esmaier
Que ens el bois s’est alée afichier,
Que ne la puist avoir ne recovrer.
Or prie Dieu, le voir jouticier,
Qu’Auberi gart de mortel encombrier.
Quant la roïne a véu cel estor,
A grant merveille ot ele grant paor.
Dont Dieu reclaime, l’umaine criator,