Page:Anonyme - Macaire, chanson de geste.djvu/267

869—895

75

Macaire.

Et fu Macaires à son ostel alés ;
Mires manda, qui sa plaie ont bendé. (*)
Et a Macaires sa gent si apelé.
« Segnor, fait il, se de noient m’amés,
« Quant au palais je serai retornés
« Et que serai as tables asegiés,
« Se ancor fust cil levriers repairiés,
« Chascuns de vos ait un baston quarré ;
« Faites qu’à moi ne soit aproïsmés. »
Et cil li dient : « Volentiers et de gré ;
« Bien ferons nos la vostre volenté. »
Et li chiens ot de celui pain mengié
Qu’il en avoit de la table porté.
Trois jors remest, que n’en est desevrés,
Et quant il ot la fain assés duré,
Devers la cort se rest acheminé
Droit à cele ore qu’il ert aparillié.
Et ert Macaires à la table asegiés ;
Ancor avoit le vis enmalolé. (*)
A la cort ert venus, si s’ert mostré
Por que la gent nen éust mal pensé.
Et est li chiens sus el palais montés,
Et vers Macaire se fust tost eslaissié,
Quant cele gent o lor bastons quarrés
Forment le hue et de grans cops le fiert. (*)
Et à la table s’en est li chiens alés,
Dou pain a pris, si s’en est eschampé,