Dont tote gent se prist à merveiller.
A son segnor est chiens repairiés.
Naimes apele l’emperéor Kallon.
« Sire, fait il, entendés ma raison :
« Itel merveille ja ne vist mais nus hon.
« Se m’en créés, nos ensi la ferons :
« Nos serons prest, chevalier et péon,
« Quant li levriers venra, que le sivrons.
« N’est sans merveille de ce que nos véons. »
Dist l’emperere : « A Dieu benéiçon. »
Et li levriers ne fist arrestison ;
Quant il ot fain, ne fist demorison,
A Paris vint, si com oï avons.
Quant au palais fu, el maistre donjon,
Li chiens esgarde entor et environ
Se il péust véoir Macaire o non.
Et cil qui ont en lor mains le baston
Ja le ferissent, quant Naimes li preudon
Les contralie, si lor crie à haut ton :
« Ne le touchiés por les .ii. iex dou front. » (*)
Et cil le laissent, o volsissent o non.
Et l’emperere le bon duc Naimon,
Et li Danois o moult d’autres barons,
