« E qi de ço me vole calonçer
« Apresté sui por bataia proer. »
A ste parole vint N. de Baiver,
Oldi li traito si altament parler
Por li so parenté no le olsa nul contraster.
N. le guarda, n’ait en lui qe irer,
El dist al roi : « Or le lasez aler,
« E prendés conseil da li ves çivaler.
« De le çuçer fari à son loer
« E se por paure vu ve retra arer,
« Nen seri degno d’eser mai enperer. »
Li enperer nen demoro ne mie ;
Fe asenbler tota sa baronie,
E furent plus de cento de gran çivalerie ;
Sor li palès de la sala antie
Fu asenblés, qi ne plançe ne rie.
« Segnur, dist li rois, nen lairo nen vo die
« Fato m’estoit una gran stoltie :
« Calonçé m’estoit ma muler donde son vergognie,
« Ne morto Albaris, don son gramo e irie.
« Concelés moi, e vos demando e prie,
« Ne non guardés por paure d’omo qe sie. »
Quant li baron ont la parola oïe,
