« Et qui de ce me vorra encorper,
« Vez moi tot prest par bataille prover. »(*)
A ces paroles vint Naimes de Baivier ;
Le gloton ot si hautement parler
Por son lignage nus n’ose i contrester.
Naismes l’esgarde, n’ot en lui qu’aïrer,
Et dist au roi : « Or le laissiés aler ;
« Conseil prenés des vostres chevaliers.
« De lui jugier feriés à son loier ;
« Se por paor vos retraiés arier,
« N’estes mais dignes de corone porter. » (*)
Li emperere nen a demoré mie ;
Fist asenbler tote sa baronie.
Plus de cent furent de grant chevalerie ;
Sus el palais, en la sale votie (*)
Asenblé furent, qui qu’en plort o en rie.
« Segnor, dist Kalles, ne lairai vos die
« Faite me fu une grans estoutie :(*)
« A grant vergoigne ma moillier chalengie, (*)
« Mors Auberis, dont en ai l’ame irie. (*)
« Conseillés moi, si vos demant et prie
« N’aiés paor d’ome qui soit en vie. »
Quant li baron ont la parole oïe,
