« Qe voio conter tot li mon engan. »
Li rois l’intende sin fo legro e çoian.
L’abés da San Donis fa apeler mantenan ;
Et cil le vene voluntera por talan.
Le enperer nen fo pais demoré ;
L’abés da San Donis el oit demandé,
E cil li vent voluntera et de gré.
Li rois li oit in la stelea mandé,
O li can tent Macario seré
N’en poit mover ne le man ni le pé.
Cun bocha avoit molto planeto parlé.
E l’abes quant li fo acosté,
Elo l’oit por rason demandé
S’elo vole dire la verité,
Q’elo soit ben cun l’ovra est alé
Segondo cun la raina li avoit conté.
Dist Machario : « Ora me confesé
« Si me asolveri de tot li me peçé,
« Qe je so ben qe son à mort çuçé
« E poco me vara toto me parenté. »
Dist l’abes : « Si grant e li peçé
« E cuito ben qe dites verité ;
« Ma no por tanto, se le vor contaré
