Si que croler ne s’en puet tant ne quant,
Quant l’emperere le proie doucement
Que por s’amor il l’en voise laissant.
Et cil le fist tantost, al suen commant.
Com criature qui éust escient,
Si fist li chiens trestot le suen commant.
Et puis que l’ot deslivré voirement,
Ainçois que l’abes fesist desevrement,
Il le seigna si le fist penéant.(*)
Oiés, segnor, que fist Kalles li ber
Par le conseil duc Naimon de Baivier :
Macaire fait cobrer tot en premier
Et à roncins le fait il traïner
Par tot Paris, et devant et derier.
Après lui vont péon et chevalier, (*)
Petit et grant, garçon et bachelier,
Moult hautement et huchier et crier.
Chascuns disoit : « Muere li pautonniers
« Qui la roïne vout honnir et grever
« S’ocist Aubri, le meillor bachelier
« Que se péust en Paris atrover ! »
Ainsi le menent et devant et derier.
