Quant ont ce fait, retornent al placer ;
Illec ont fait un grant feu alumer,
Illec le font et ardoir et brusler.
Parent qu’éust n’i purent contrester.
Quant ont ce fait, si l’ont fait enterrer.
Cil de Maience en ont grant reprovier. (*)
Or lairons ci dou traïtor ester ; (*)
Si com ovra ot éu son loier. (*)
A Paris est remés Kalles li ber, (*)
Si fu dolens de sa franche moillier,
Et d’Auberi que il avoit moult chier,
Et de Macaire qui ert ses chevaliers.
A la roïne nos covient retorner.
Quant a véu l’oevre si afiner,
Et Auberi jus del cheval verser, (*)
Parmi le bois si se mist ad errer.
Ains que trovast là le bon Varocher,
Tormens et peines li covint endurer.
Enceinte et grosse estoit d’un bachelier,
Si qu’à grant peine ele pooit aler.
Vait s’ent la roine à duel et à torment ;
A grant merveille estoit ele dolens
