« Ancora por moi sera rico e manent. »
Dist Varoche : « Vu parla de nient ;
« Ne vos o abandoner à tot mon vivent.
« Venez rer moi, eo aliro avent
« Trosqua à ma mason qe est qui davent,
« O aço ma muler e dos beli enfent.
« Conçé eo demandro, pois aliren avent. »
Dist la raine : « Soia à li ves coment. »
Adoncha s’en vait anbes comunelment,
Tant qe à sa mason i se vait aprosment.
Quant Varocher fu à sa mason venu,
El entra en la mason, la soma deponu.
« Dama, fait il, no m’atendez plus,
« Si seroit ben tot li mois conplu. »
E quela li demande : « Mon sir, o alez vu ? »
E cil le dit : « Or sta al Deo salu,
« Del revenir eo no te so dir plu. »
En soa man oit un gran baston prendu.
Grant fu e groso e quaré e menbru ;
La teste oit grose, le çavi borfolu :
Si strançes hon no fo unches veu.
