« Et c’est m’oissors qui m’est riere venu. »
Quant ot li ostes Varocher entendu,
A sa moillier dist que bien ait péu(*)
Et aaisié la dame sus et jus ; (*)
Et le fait cele, qui bien membrée fu.
Or vont moult bien la roïne osteler ;
De tot ice que li venist à gré
Li a l’ostesse à son vouloir doné,
Por quoi l’en rent mercis de grant bonté.
Cele l’esgarde par flans et par costés,
Grosse la voit, si l’en a pris pité.
Or li demande que est icil maufés
Qui tot jor porte ce grant baston quarré,
S’il a nul sens o se il est desvés.
Dist la roïne : « Ensi l’a il usé. (*)
« Ne l’adesés ne ne le corrocés,
« Que de son sens n’est mie bien temprés.
« Ce est mes sire, cil qui m’a à garder. » (*)
Et dist l’ostesse : « A li soit l’honors Dé !
« No pooir ert servis et honorés. »
Varocher donent ce qu’il ot comandé
Plus par paor que par boine amisté.
