— Sire, fait il, un moult très bel enfant
« De une dame et bele et avenant.
« A mon ostel vint l’autrier descendant ;
« D’un fil s’agiut qu’au mostier vais portant, (*)
« Et c’est ses peres qui derier vient errant. »
Li baron gardent, s’en ont ri belement,
Que bien lor pert estre uns hom de noient.
Dist l’uns à l’autre : « Cist me pert uns truans,
« Uns hom sauvaiges ; il en a le semblant. »
A ces paroles, se trait li rois avant,
Le mantel prent si le soslieve atant
Por ce qu’il velt véoir celui enfant.
Et si li voit, quant le vait esgardant,
Sor destre espaule une crois blanchoiant. (*)
Quant l’a véu, moult s’en vait merveillant ;
Or voit il bien n’est pas fis à truant.
A Primerain dist : « Alés belement,
« Que je voil estre à bautisier l’enfant. » (*)
Dist Primerains : « Tot soit al Dieu commant ;
« Moult par me plaist, se Diex me soit aidant. » (*)
Adonc li rois ne se vout atargier,
O Primerain si s’en vait au mostier,
