En Ongarie vene poveremant,
Blasmea fu à grando traïmant,
Donde li rois à qi França apant
De son reame l’a caçea vilanemant :
« Venua e in Ongaria et ilec vos atant,
« Qe le mandés à dire de le vestre talant. »
Va s’en li mesaçer por la mer naçant ;
Tant alirent, nen fi arestamant,
Qe al porto de Costantinopoli desant.
Quant furent desendu, i s’en vait avant,
Ad un albergo i s’en vait ostalant.
Quant l’inperer sait li convenant,
Donde venent e qi von querant,
Elo li reçoit e ben e çentilmant,
Si le convie à son palès grant,
Por oldir novelle li quer e demant.
Quando li rois vide li meçager,
Elo li demande e pois si le requer
Que ambasea i le doit nonçer.
E cil tosto li prendent à conter :
« Emperer sire, nu vo devon conter
« Qe vestra file, Blançiflor al vis cler,