« Aprestés est del tot de l’otrier.
« Et vostre fille si vos prie et requiert
« Ne la voillés por rien abandoner. »
Quant l’emperere les oï si parler
Et de sa fille les noveles conter,
S’il en ot duel n’est mie à merveiller.
Les messagiers qui li vienent noncer,
Moult richement les a fait honorer,
Le roi d’Ongrie hautement mercier. (*)
Quant la novele vint à l’emperéor
De soe fille qu’ot fresche la color,
A grant merveille en ot il grant dolor,
Si que por ele ne puet ester ne plort.
Dist as mesages : « Nos ferons le meillor,
« Que je penrai de mes ambaxéors
« Et por ma fille manderai à estros, (*)
« Si la ferai venir à grant honor ;
« Mais ne faura guerre à l’emperéor (*)
« Quant à ma fille a fait tel desonor. »
Adonc li rois ne vout faire sejor ;
Fist apeler ses chevaliers meillors.
