Page:Anonyme - Macaire, chanson de geste.djvu/357

1942—1968

165

Macaire.

Et dist li rois : « Bien fait à otrier.
« Qui porriens encore i envoier ? »
Et dist dus Naimes : « Berart de Mondidier,
« Qui autre fois i est alés l’autrier. »
Adonc li rois le fist querre et mander.
Et cil i vint de gré et volentiers.
« Berars, fait il, il vos covient aler
« L’emperéor une autre fois parler,
« Et si l’aurés à dire et à conter
« Que sa fille ne sai rien esperer,
« Mais l’acusere ot éu son loier :
« En feu fu ars et la poudre à venter.
« Dont le pri s’ire me voille pardoner,
« Qu’apresté sui d’amendise baillier
« D’or et d’avoir, de besans et deniers. »
Et dist Berars : « Bien fait à otrier.
« Congié vos ruis, que je m’en voil aler. »
Et dist li rois : « Alés et ne targier. »
Et cil Berars s’en vint à son ostel,
Aprestés fu de ce que l’ot mestiers,
Par le chemin si se prist à l’errer.
Costantinoble ains que péust trover,
Ja la roïne à son pere alée ert
Et tot le dist, n’i laissa que conter
Dou roi Kallon, si com la fist geter
Fors de son regne et la fist convoier,
Et par Macaire li vint cil encombriers