« Le roi Kallon fumes nos aresnant
« Et duc Naimon, le conseiller plus grant
« Qui soit el mont et derier et devant.
« Par nos vos mande ne vos dote noient,
« D’avoir baillier à vos n’a nul talent.
« Sel desfiés, et il vos ensement :
« Asés a il de chevaliers vaillans,
« Les vos ne dotent un denier valissant. »
Dist l’emperere qui les vait escotant :
« Bien le saura Kalles ainçois lonc tans ;
« Se ancor sui en cestui mont vivans,
« O je o il seromes à noient. »
L’emperere a oï les mesagiers :
Que Kallemaines de France et de Baivier
Ja ne le dote valissant un denier.
Par le conseil de tos ses chevaliers
Fist s’ost bannir de par tot son terrier.
Nen laissa vile, ne borc, ne fermeté,
Qu’aler n’i face les baniers de toz lez.
Ainçois un mois tant en fait asembler
Que il en ot bien soissante milliers.
Or aït Diex Kallemaine au vis fier !
