Li emperere ne s’atarge noient ;
Il a semons par tot son tenement
A bors, à viles, à chastels, à pendans,
Trestos ses homes et amis et parens.
Asemblé furent entre tote sa gent
Soissante mile, à vers elmes luisans,
A palefrois et à destriers corans.
Li emperere n’i fait arrestement ;
Sa fille fait atorner richement,
Et ensement le suen petit enfant.
Et Varochers, li preus et li vaillans,
Ja nen a mie sojorné longement ;
Armes a pris et autres garnemens
Li quiex estoient trestot à son talent.
Un grant baston qui ert quarrés devant
S’avoit il fait, qui gros ert et tenant,
Et sans celui ne vait ne tant ne quant.
Or l’emperere asemblé a s’ost grant
Et devers France chevauche iréement.
Or Diex conseut Kallon le roi poissant,
Qu’uns maus traïtre l’a mis en grant torment.
