Naimes parole, si a dit sa raison :
« Sire emperere, ne sai quel la ferons,
« Ne boin conseil doner n’en puet nus hom,
« Quant me porpense de la grant mesprison
« Et del grant duel, de la confusion
« Que fait avés sa fille Blancheflor. (*)
« Meillor conseil ja prendre ne poons
« Se ce n’est, sire, que nos aparillions
« Et issons fors à no defension.
« Miex ert morir qu’ester ci en prison,
« Puis que ne vuet ne merci ne pardon,
« Ne de sa fille avoir la réençon. »
Dist l’emperere : « Et nos si le ferons. »
A itant fait asembler ses barons ;
Bien trente mile furent il es arçons. (*)
A Ysoré baille son gonfanon,
Et au Danois et au conte Fagon ;
Et Belians i fu, de Besançon.
Cil ont guié l’enseigne roi Kallon
Costantinoble envers l’emperéor.
