Page:Anonyme - Macaire, chanson de geste.djvu/391

2333—2359

199

Macaire.

Bien cuideroit que fust uns aversiers.
Ne vait en rote avec les chevaliers,
Ains vait deriere avec les escuiers,
Et si se fait lor sire et avoé.
Que vos diroie del prodon Varocher ? (*)
Bien conoist il la voie et les sentiers,
Et de Paris et l’issir et l’entrer,
Et les ostels des riches chevaliers.
De nuit s’en vait, ains qu’il soit esclairié,(*)
En l’ost s’afiche de Kallon au vis fier.
Laiens s’en vait à guise d’escuier,
Et si s’afiche ens el demainne tref, (*)
Là où savoit qu’erent li bon destrier.
Tot le meillor se fait il enseler,
O soi l’en mene, qui qu’en doie anuier.
Et quant s’en est à l’ost des suens tornés,
En haut s’escrie : « Monjoie, chevalier ! »
Et si comence à braire et à crier :
« Sus levés vos, et ne vos atargier,
« Qu’en l’ost Kallon venons nos de préer,
« Si avons nos tot son meillor destrier ;
« Ja nen aura sor quoi il puist monter. »
Quant cil l’entendent, se vont esmerveiller
De la parole que dite a Varochers.
Qui donc véist icele gent monter,
Les armes prendre et salir es destriers,
Vers l’ost Kallon et poindre et chevaucher !