Montent à destrer isneli e corent.
Gran fu la nose à quel comançament.
Qi donc véist qi çivaler valent
Ferir de lançes e d’espée trençent !
Qi de Constantinople nen furent mie lent ;
Et l’imperer de Françe le foit ensement,
El dux N. e Oger li valent.
Por la gran presie vent isnelement
Un çivaler ardio e posent :
Cil avoit nome li pros Floriadent.(*)
Plus valent hom non est in Orient ;
Nevo ert e prosman parent
De l’inperer à qi Constantinople apent,
E Blanciflor el l’ama dolcement.
En la bataile se mist iréement,
Fer un Fraçeis por tel envasament
La tarça li speçe e l’aubergo li fent,
Al cor le mis le glavio trençent,
Morto l’abate, dont K. en fo dolent,
El s’apeloit ses proçan parent.
A gran mervile fo Floriamont orgolos
Fort e ardi et de malin artos,