Varocher s’en torne, cun li ses compagnon ;
Aporté n’avoit l’avoir de l’inperer K.
E si n’amenoit son destrer aragon,
Donde ne fu in gran sospicion.
E l’inperer de Costantinople non fait arestason,
El fa monter ses çivaler baron,
E prender arme e monter in aragon
Por asalir l’inperaor K.
E furent .xxx. mile quant furent en arçon ;
E quisti çivalçent sens nosa e tençon.
Blanciflor la raine à la cler façon
Si se remis plurando al pavilon,
Dolente estoit de l’inperer K.
E de son pere c’avoit cun lui tençon.
E qui çivalçe à força e à bandon,
L’oste asali, qi ni pisi o non.
Gran fu la nose quant levent li ton,
E K. Maine e le dux N.,
Bernardo da Mondiser e le dux Sanson,
E Ysoler et le dux Folcon,
Prendent les armes, montent en aragon
L’oriaflame desploiarent amon.
