Or cil s’en torne, o lui si compaignon ;
L’avoir en portent l’emperéor Kallon
Et si en menent son destrier aragon,
Dont nostres rois fu en grant sospeçon.
Et l’autres rois ne fist arrestison,
Si fist armer ses chevaliers barons,
Et si les fist monter es aragons
Por asalir l’emperéor Kallon.
Trente mil furent quant furent es arçons ;
Et cil chevauchent sans noise et sans tenson.
Et Blancheflor à la clere façon
Si est remese plorant el pavillon,(*)
Que dolens ert de Kallon, son baron,
Et de son pere qu’avoit o lui tenson.
Et cil chevauchent à force et à bandon,
L’ost asalirent, qui qu’en poist o qui non.
Grans fu la noise quant leverent li ton
Et Kallemaines o le bon duc Naimon,
De Mondisdier Berars o duc Sanson,
Et Ysorés o le bon duc Folcon,
Les armes prenent, montent es aragons
Et l’oriflambe ont desploïe amont.
