Page:Anonyme - Macaire, chanson de geste.djvu/433

2835—2861

241

Macaire.

Ja fust lor rois recréans apelés
Quant cil d’Ongrie li a socors doné
A tout dis mile Ongrois de son regné.
Et Varochers ne se tint pas derier.
D’ambedeus pars si forment sont meslé
Nel porroit on dire en chartre n’en bref.
Tot icel jor, tant que fu avespré,
A la bataille d’ambedeus pars duré,
Quant Kallemaines s’est en haut escrié,
L’emperéor se prist à apeler.
Et cil à lui s’en vient tot conréés.
A parlement chascuns se trait arier.
« Sire emperere, dist Kalles li senés,
« De une rien moult me puis merveiller,
« Quant vos avés sofert et enduré
« Venir en France asegier ma cité.
« De vostre fille sui et grains et iriés ;
« Se ele est morte, bien vos ai je vengié
« Dou traïtor qui me l’ot acusé ;
« Mais neporquant s’amendise en volés,
« Si l’aurés vos tot à vo volenté
« D’or et d’avoir, de deniers monéés. »
Et cil li dist : « Mar l’avés porpensé
« Quant por ma fille fu li feus alumés.
« Ne fust li abes qui l’ala confesser,
« Qui d’ele sot tote la verité
« Et que grosse ert de fil et d’iretier,