Page:Anonyme - Macaire, chanson de geste.djvu/441

2938—2964

249

Macaire.

« Une espée a qui trenche volontiers :
« Courtain l’apelent Alemant et Baivier.
« Plus trenche fer ou rubis ou acier
« Que nule faus ne fait l’erbe el vergier. »
Dist la roïne : « Et l’ai bien enpensé. »
Dist Varochers : « Pensés de l’esploitier,
« Que sans targier vorrai ou champ entrer. »
Et dist Berars, icil de Mondisdier :
« Varochers sire, vos avés bon penser,
« Mais bien porriés cele oevre trop haster,
« Que tés se cuide et vendre et eschangier
« Qui à la fin le compere moult chier.
« Mal conoissés le bon Danois Ogier ;
« En tot le mont et devant et derier
« En paienie et par crestienté
« Ne troveriés un meillor chevalier. »
Dist Varochers : « Bien l’ai oï nomer,
« Mais neporquant ne le dote un denier,
« Et d’une rien vos voil acréanter :
« Puis que mes sire m’adoba chevalier,
« Sui devenus si orgoillos et fiers
« Que, quant dou bois me vient à remembrer
« Où sor le dos tel fais oi à porter
« Come poroit faire uns corans destriers,
« Plus ne vorroie à cel mestier torner.
« Sachiés por voir, se Diex me vuet aidier,
« De retorner au bois n’ai nul penser.