« Soloia aler vesti de pani de paltoner
« Et in man portoie un baston de pomer ;
« E uio si son vesti à lo de çivaler
« E a mon la li brando forbi d’açer.
« Quando ço voi, et mon cor son si fer
« Qe non redoto homo nuio de mer.
« Converser soloie cun bestie averser ;
« Ora demoro en çambra d’inperer,
« E quando voio s’ovro so camarler. »
Dist la raine : « Tu a molt bona sper ;
« Nen so q’en die ne responder darer.
« Tant e tu saço en dir e en parler
« Le to parole e non voio amender ;
« Ma tota fois avero par toi proier
« Jesu de glorie, li vor justisier,
« Qe de la bataile te lasi arer torner
« E sano e salvo dever le dux Oger. »
Dist Varocher : « Or lason li parler
« E si me faites le arme aporter. »
Dist la raine : « De grez e volunter. »
Blançiflor la raine à la clera façon
De Varocher oit gran doteson.
