Fort sont les anstes, li fers trenchans en fu,
Li dui baron si sont de grant vertu.
A si grant force se sont aconséus
Qu’engenoillié sont li cheval andui.
Là pert il bien que il ont grant vertu,
Que de lor anstes sont li tronçon chéu.
Outre s’en passent li bon cheval crenu ;
Ne l’uns ne l’autre nen i a rien perdu.
Li chevalier sont et preu et vaillant ;
Outre les portent andui li auferrant,
Ne l’uns por l’autre ne soploie noient.
Lor destriers tornent, chascuns a trait le branc
L’uns devers l’autre, à guise d’olifant.
Mais Varochers se trait plus en avant
Et fiert Ogier desor l’elme luisant,
Grant cop li done, mais ne l’empoint noient,
Que Damediex li estoit à garant.
L’espée torne sor la targe devant,
Si en detrenche tot quanques ele en prent,
Et de l’auberc la gironée avant.
« Sainte Marie, dist Ogiers li vaillans,
