Le texte de cette page a été corrigé et est conforme au fac-similé.
268
3184—3201
Macaire.
Coment li Danois apelloit Varocher.
Quant li Danois oit oldu la novelle,
A gran mervile ela li paroit belle.
De çoia qe il tot li cor li saltelle,
Deo mercie e la Verçen polçelle,
O el vi Varocher dolçement l’apelle,
« Varocher, fait il, dito m’avés tel novelle
« Plus me l’a chara qe l’onor de Bordelle,
« De vos amer tot li cor me renovelle.
« A K. m’en çiro, q’e segnor de Bordelle,
« Diro qe m’avés et abatu de selle. »
Coment li Danois parolle.
« Varocher, dist li Danois, nen vos ert cellé,
« Tel colsa m’avés dito e conté
« Plus n’oe çoia qe se aust guaagné
« Eser segnor de Roma la cité,
« De la raine qe viva est trové.
« A K. maine e tornaro aré ;
« Ça questa colse no le sera conté,
« Mes altrament le sera devisé,
