Page:Anonyme - Macaire, chanson de geste.djvu/465

3229—3255

273

Macaire.

« Mais qui porrons, fait il, i envoier ? »
Dist li Danois : « Bien le sai je trover :
« Naimes li dus et je de l’autre lez. »
Dist l’emperere : « Si soit il otrié.
« Ja dous meillors ne porroit on trover. »
Adonc se vait dus Naimes conréer,
De riches dras vestir et atorner.
Et li Danois ne s’est mie oblié,
Qui bien savoit tote la verité
Com l’ot oï à Varocher conter,
Et por ice s’en vait joians et liés.
Andui se partent quant pris ont le congié.
Tant ont erré par le chemin plenier
Li premiers hom que il ont encontré
Varochers fu, com l’avoit ordené
O le Danois, quant de lui fu sevrés.
Quant l’ont véu, grant joie en ont mené,
Et li dus Naimes l’a par la main cobré,
Et li Danois le prist de l’autre lez.
Devant Kallon issi l’ont amené.
Li rois les voit, si s’est por eus levés ;
Naimon asist à son destre costé.
De l’autre part, à son senestre lez,
Sist li Danois de bone volenté,
Et Varochers devant eus este en piés.
Des barons furent andui moult esgardé,
Loé en furent et des bons et des mels.