Naimes parole toto primerement.
« Droit enperer, dist il, à moi entent ;
« Voir vos diro por lo men esient.
« Non est nul colse in ste segol vivent,
« Pois q’el e fato et oit pris feniment,
« De retorner arere de le en nient.
« Unde eo pri, por Deo onipotent,
« Qe à K. maine, qe fu vestre parent,
« Li perdonés de cor e de talent,
« Et el sera à ves comandament
« D’obéir vos, e lui e sa çent. »
Dist l’inperer : « Vu parlés saçement,
« E vos voio dire à vos apertament
« Quando ma file marié primement
« E non avoie amigo ni parent
« Ke tant amoie cum K. loialment.
« Oro it il fato ver moi desloialment,
« De ma file fato desloialment
« Si la çuçoit à li fois ardent.
« Calonçea fo à torto vilment ;
« De quela colsa qe estoit falsament
« Nen poso ester qe à vos non palent.
