Kalles li rois prist l’enfant à garder
Et si li prist et querre et demander :
« Bel fil, ta mere com se fait apeler ?
« Et de ton pere di com l’oïs nomer. »
L’enfes respont : « Ne vos le quier celer,
« Ma mere oï Blancheflor apeler,
« Mes peres est Kallemaines li ber, (*)
« Si com l’oï à ma mere conter. »
Li rois l’esgarde si le prist à baiser :
« Bel fil, fait il, moult vos doi avoir chier ;
« Après ma mort vos ferai roi claimer
« De dulce France, Normandie et Baivier. »
Et dist dus Naimes : « Or laissiés ce parler,
« Que de l’acorde huimais estuet penser, (*)
« Si que menée en aiés vo moillier. »
Et dist rois : « A vos vient cil plaidiers
« De la pais faire et la guerre laissier. »
« Sire emperere, ce dist li dus Naimon,
« O la roïne ai esté à tençon ;
« Tot m’a conté de soe entencion.
« A parlement, cui qu’en poist o cui non,
« Venrés andui le trait à un bouzon :(*)
