K. li rois prist l’infant à guarder
E si le prist querir e demander.
« Bel filz, fait il, come a nome ton mer ?
« E di à moi li nome de ton per. »
Dist l’infant : « Ne vos li o çeler,
« Dama Blanciflor oï à nomer ma mer,
« Mon per oï nomer K. maino l’inperer,
« Cun ma mer me conte quando me ven parler. »
Li rois si le reguarda si le prist à baser.
« Bel filz, fait il, vu me si molto çer ;
« De pos ma mort ve fari rois clamer
« De França belle, Normandie e Baiver. »
Or dist N. : « Lasez li parler,
« Qe de l’acordo ora se vol penser,
« Si qe aiez emena ves muler. »
Dist li rois : « A vos ven quel plaider
« De far la pais e la guera laser. »
« Emperer sire, ço dist le duc Naimon,
« Cun la raine sonto ste à tençon ;
« Tot m’a conté de soa entencion.
« Un parlamento vo fare, qe ne pisi o non ;
« Un e l’altro enperer serez à un bolçon :
