« De moie part faites l’acordement. »
Et dist dus Naimes : « Vo parlés saigement ;
« A noient soit l’ire et li mautalens. »
Li rois l’esgarde, tos li cuers li sosprent ;
Ja parlera à loi d’ome vaillant.
« Sire emperere, dist Kalles li poissans,
« Ne tancerai avec vos longuement ;
« Se faite ai chose qui à vos soit pesans
« Aparilliés sui de l’amendement.
« Ne sai que dire : Dieu et à vos me rent.
« En par avant fui je vostres parens,
« Si l’er après, se la dame i consent. »
Dist la roïne : « Mais ne fui si joians ;
« Mais d’une rien vos di apertement :
« De plus en faire ne vos viegne à talent. »
Oiés, segnor, sachiés certainement,
Desor tos rois, princes et amirans
Fu Kallemaines, li riches rois, sovrains.
Ja n’ama mais traïtor ne tirant,
Joutice ama si fu droit maintenant.
O l’autre roi a fait acordement,
Tot se pardonent l’ire et le mautalent.