« Jel vous ferai richement adrecier
« Se vous poés mon afaire esploitier.
« Mais or me dis por Dieu le droiturier,
« Manrai o moi serjant ne chevallier ?
— Nanni, biax sire, » se li dist sa mollier,
« Fors moi et vous et cel cortois paumier. »
Onque H. nel vaut por ce laissier :
Dusqu’a .ij.c. fait armer chevallier[s] ;
En la foret les a fait anvoier.
Por ce le fait qu’il doute le paumier,
Et ces convinnes malvoisement li siet.
« Sire H., » ce li dist sa mollier,
« A la fontainne alons sans delaier.
— Dame, » dist il, « trop nous poés coitier ;
« Si grant talent n’an aviiés pas hier. »
H. monte sor .j. courant destrier,
La jantil dame sor .j. palefroi chier ;
Au pelerin an a fait .j. baillier.
Vers la foret prennent a chevauchier ;
Dedens s’an entrent par .j. petit sentier,
Et la maisnie H. le Pohier
Furent alés .j. autre chemin viés.
La gentil dame a resgardet B. :
Tot maintenant le prist a entiercier
Par .j. plaie qui desos l’uel li siet ; [1]
Bien recognust c’est son marit premier.
Petit s’an faut nel corut enbracier, [2]
Mais elle n’ose por H. le fier.
La gentil dame a B. cogneüt,
Par .j. petit que baisier nel courut ;
Por H. son coraige a tenut.
