Trés devant lui vait .j. paien ferir ;
Dusqu’es arçons le traincha et fendi
Et le cheval a il trainchiet par mi.
Quant l’amassors a le conte choisit
Et voit le cop qu’au Sarrasin feri,
De la paor fu forment esbahis ;
Por tot l’or Dieu B. n’atendist :
Plus tost qu’il pot en la fuie c’est mis,
Et B. l’anchauce par aïr.
Quant ne le pot consivir ne ferir,
Il et sa gent se sont el retor mis,
S’ont lor eschac par le chanp recoilli :
Mil et .vij.c. chevalliers i ont pris.[1]
En la cité s’en entre[n]t par loisir,
S’ont lor gaaing devant le roi parti,
Et les prisons dedens la chartre mis.
Li rois Corsubles B. a raison mist :
« Crestiiens frere, molt iers prex et gentis ;
« Molt par as bien acuité mon païs.
« Se tu ne fusses, par Mahon le postif,[2]
« Je fusse mors, honnis et mal baillis,
« Et mi paien refussent mal baillis,
« Et tous mes regnes escilliés et hon[n]is :
« Par seul ton cors en sui je garandis.
« Se or voloies demorer avuec mi,
« Tot mon roiaume te partira[i] par mi.[3]
« Cités avras et chastiax a tenir ;
« Ja n’ieres povres tant con tu soies vis. »
Et dist B. : « Por autre chose vins.
« Quant a Saint Gile fui de vostre gent pris
« Et Sarrasin m’orent loiet et pris
« Et a vos m’orent presentet et tramis,
« Et vous m’eüstes en vostre prison mis,
« Dedens la ville avoie .j. petit fil :
Page:Anonyme - Raoul de Cambrai.djvu/380
Cette page a été validée par deux contributeurs.
269
raoul de cambrai
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page380-1024px-Anonyme_-_Raoul_de_Cambrai.djvu.jpg)