« N’ot que tier jor que de mere nasqui.
« Ça vins a vous por novelle[s] oïr,
« Se me savés a dire qu’il devint :
« Se vos l’avés, ne le me celés mi.
— Nanni, biau frere, par mom dieu Apolin,
« Ne sai ou est ne, certes, qu’il devint. »
B. l’entent, pleure des iex del vis,
Puis en apelle son neveut Savari :
« Biax niers, » dist il, « or vait de mal en pis :
« Se nel trovons, nous sonmes mal baillis. »
Dist Savaris : « Je ne vous quier mentir :[1]
« Les prisons faites de la chartre issir,
« Car je an vuel la justice veïr. »
Et dist Corsubles : « Tot a vostre plaisir.
« .I. an i a, a grant mal nasquit il,[2]
« Qui Boïdant mon frere m’a ocis.
« Foi que je dois Mahom et Apolin,
« Je le ferai de male mort morir :
« Trestout l’or Dieu ne le porroit garir. »
Li rois Corsubles apella Salatré,
Celui qui a de la chartre les clés :
« Les prisoniers devant moi amenés. »
Et cis respont : « A vostre volenté. »
Adont les a de la chartre jetés ;
Devant Corsuble furent tuit amenet.
Lors a Corsubles Juliien apellet :
« Vassal, » dist il, « trop par fustes osés. »[3]
Dist Juliiens : « Je l’ocis tot de gret,
« Car, c’il peüst, il m’eüst afolet.