« Molt redous, lasse ! le mien pere Gr.
« Quant vint ersoir, que prime m’endormi,
« Sonjai .j. songe dont forment m’esbahis,
« Que je veoie mon singnor revenir ;
« Gr. mes peres l’ot forment envaït,
« Que devant moi a terre l’abati :
« Fors de son cors les .ij. … li toli[1]
« Et moi meïsme le senestre tol[i],
« Puis vis ces sales et ces palais chaïr ;
« De la paor maintenant m’esperi.
— Ce est biens, dame, » ses fis li respondi.
Andemantiers qu’il parloient ainsis,
Atant es vous Garnier et Savari.
Lés la ville ot .j. prioré petit
Que B.-Bierre apellent ou païs.[2]
La ont li moingne B. recoilli :
Le cors li levent de froide iaue et de vin,
Puis l’ont cousut en grant toile de lin.
Tot maintenant l’ont en la bierre mis,
Et par desus .j. molt biau paile bis.
Et la contesse i vient tot a anvi,[3]
Et .j. messaige droit ancontre li vint :
« Dame, » fait il, « par Dieu qui tot bien fit,
« Revenus est Garniers et Savaris,
« Et si aportent .j. chevallier ocis. »
La dame l’oit, tos li mua li vis :
« Lasse ! » dist elle, « mes songe est averis ;
« Bien sai de voir c’est B. mes amis ! »
La jantil dame fu formant effraée :
Sa robe a escorcie et levée ;
