« Biax iers, » dist il, « vos m’avrés [grant] mestier,
« Car sor moi vient .j. os mervelle fier.
« Si les conduient li .ij. anfans B.,
« Que je ocis par mon grant destorbier. »
Dist Gaut. : « Sire, certes ce fu pichiés.
« Por vostre fille le deüssiés laissier
« Que li donastes a per et a mollier.
« Les .ij. enfans deüssiés avoir chier ;
« N’est pas mervelle se il vos en meschiet.
— Ne puet autre estre, » ce dist Gr. li fiers.
« Contre iax vaurai mon païs chaslaingier. »
A ces paroles oient les gens noisier,
Car cil de l’ost orent tant esploitié
Que as grans portes feroient li premier.
Li .ij. anfans firent les gens raingier.
Tost sont armés serjans et chevallier ;
Sor les chevax furent ja li archier.[1]
A la fenestre del grant palais plaingnier
S’an vait Gr. et avuec lui Gautier,
Et voient l’ost de la ville aprochier.
Gr. escrie : « Trop me sui atargiés
« Quant ne lor vois ma terre chaslai[n]gier,
« Ains qu’il se puissent devant les murs logier.
« Ceste venue conpar[r]ont il molt chier. »
Gr. escrie : « Armés vous, chevallier,
« Et .j. et autre, serjans et escuier ! »
Adont s’armerent, qu’il ne l’osent laissier.
A plain s’en issent et furent .xx. millier ;
Gr. les guie devant el chief premier.
N’i ot plait pris ne parlement nonciet ;
D’anbe.ij. pars s’an vienent eslaissiés.
A l’assanbler ot mains escus perciés,[2]
Et mains haubers desrous et desmailliés.
Page:Anonyme - Raoul de Cambrai.djvu/402
Cette page a été validée par deux contributeurs.
291
raoul de cambrai
