« An vo prison le faites [lors] lancier ;
« N’an isse mais a nul jor desos ciel. »
Il l’ostrierent quanqu’elle lor requiert.
Lors s’en tornerent et pencent d’esploitier.
De lor journées ne vous sai plus plaidier :
Dusqu’a[n] Artois n’i vaurent atargier.
Mestent le feu, les villes font brisier,
Prennent les proies et font en l’ost chacier.
En fuie tornent cis villains charruier.
A[u] sor Gr. l’est on alés noncier
Dedens Arras en son palais plaingnier :
« En non Dieu, sire, or vait a l’enpirier,
« Car sor vos vient .j. os molt grant et fier.
« Si les conduient .ij. bacheler ligiers :
« Vos proies prennent, vos villes font brisier. »
Gr. l’entent, n’i ot que correcier :
« Bien sai qui sont, par Dieu le droiturier.
« Andoi sont fil au bon vassal B.
« Que je ocis au fer de mon estrier ;
« La mort lor pere vienent vers moi vaingier.
« Or ne lairoie por l’or de Monpellier
« Que ne lor voise ma terre chaslaingier ! »
Qui lor[s] veïst le mal viellart drecier,
Les dans estraindre et la teste haucier !
En nulle terre n’avoit home plus fier.
Parmi Arras a fait .j. ban huchier
Que trestuit cil qu’arme puisse[nt] bailler
Que il s’adobent por lor singnor aidier ;
Et il si firent, ne l’oserent laissier.
Font claure portes, les wiches verollier.
Devers Canbrai lor est venus Gautier,
Cel jor meïsme, bien le vous os noncier ;
Li sor Gr. l’avoit mandet l’autrier.
A .iij.m. homes li est venus aidier.
Il descendi au grant palais plaingnier ;
Gr. le vait acoler et baisier :
Page:Anonyme - Raoul de Cambrai.djvu/401
Cette page a été validée par deux contributeurs.
290
raoul de cambrai
