De Berneison qui si estoutemant
A mort son home ; s’en a le cuer dolant.
Et dist li rois : « Ouvret a follemant. »
Que vos feroie ici lonc parlemant ?
Armer s’an vont trestuit conmunalmant ;
Vers Lenz s’en vont atorné noblemant.
D’elz vos lairons, Damedex les amant !
De Berneison vos conterai briement,
Qui a Lenz vait correciez et dolant ;
De son sanc ot le visage senglant.
Voit le li peres, s’en ot le cuer dolant,
Si li a dit assez cortoisemant :
« Dont viens tu, filz, nel me celer niant ;
« Iez de Raoul partis par mautalant ? »[1]
Et dist Berniers : « Oïl veraiemant.
« En Oreignei, el mostier Saint Vincent,
« A ma mere arse, la bele Helissant,
« Et avec li de nonnains plus de .c. ;
« Por ce que je oi itant de hardemant
« Que de ma mere li priai doucemant,
« De sa manicle mout fellonessemant
« Anmi le vis me feri duremant ;
« Senglant en sont encor mi garnemant.
« Plus i a, sire : li rois cui France apant
« Li a donnée devant moi en presant
« Perronne et Roie por vos mettre au niant,
« Hans et Neele et tot le chasemant. »
Et dist Hymbert : « Il ira autremant. »
En tant com ierent ensi an parlemant,[2]
Es vos .j. mès qui devant elz descent,[3]
Qui lor a dit, oiant toz, hautemant,
Que li rois vient a grant esforcemant.
Quant cil l’oïrent, ne furent mie lent :
As armes courent trestuit conmunalment ;
De Lenz issirent ansi espessemant
Conme la pluie quant la chace li vans.
Es prez soz Lenz s’arestent fieremant.
Page:Anonyme - Raoul de Cambrai.djvu/420
Cette page a été validée par deux contributeurs.
309
d’après girbert de metz
